Ibilbilang a “reasonable” ti maysa a grupo dagiti mannalon iti posibilidad a dumanon ti P60 agingga P62 iti presyo tunggal kilo ti bagas inton Setyembre.
Segun kenni Magsasaka Partylist chairman Atty. Argel Cabatbat, uray nu adda ti panagngato ti presyo, makatulong daytoy kadagiti mannalon tapnu makabawi iti agtultuloy a panagngina dagiti magastos ken produksiyon, nangruna iti abono.
Nupay kasta, inlawlawag ni Cabatbat a saan latta a kayat a sawen ket dakkel ti kita para kadagiti mannalon gapu ta agtaltalinaed a nangato ti presyo ti farm inputs, ken no agtipid met ti abono, sigurado a bumaba met iti apit ken lalo a mangapektar iti kita-da.
Namnamaen pay ti grupo a saan a lumagpas ti P60 agingga P62 iti presyo ti bagas tapnu saan a madagsenan dagiti konsumers.
Impeksa ni Cabatbat ti panagamak iti agtultuloy a tension idiay Middle East, a mabalin a mangparnuay ti domino effrect iti panagngato ti presyo ti langis ken dadduma pay a magatang, karaman ti bagas.
