Nainget a kinontra ni Bise Presidente Sara Duterte iti panawagan a sumuko ni Senador Ronald “Bato” Dela Rosa kasaruno ti report maipapan iti arrest warrant ti International Criminal Court (ICC).
Iti interview idiay The Hague, Netherlands, tinakderan ti Bise Presidente a saan a mabalin a maipatungpal ditoy Pilipinas iti warrant a saan nga inruar ti korte ti pagilian.
Nakalidayan pay ni VP Sara nga ipangpangruna ti dadduma a politiko ti personal nga interes ngem ti panagserbi iti publiko.
Mainaig ti imbagana iti resolusion nga inpila dagiti lima a kameng ti Minority Block iti Senado a mangparparegta kenni Dela Rosa a boluntario a sumuko kadagiti otoridad.
Impaganetget ti minoria a nabayagen a raraemen ti Senado dagiti hudisial ken prosecutorial a proseso a pakairamramanan dagiti miembro ken sigud nga opisial.
Inyarigda ditoy iti boluntario a panagsuko da sigud a Senador Antonio Trillanes IV, sigud a Senador Leila de Lima, ken sigud a Senador Juan Ponce Enrile.###
