Maisayangkat ti Municipal Government ti Agoo ti pannakaiwaras dagiti subsidy para kadagiti benepisiario ti Presidential Assistance to Farmers and Fisherfolks Program (PAFFP) inton Biernes, Mayo 15, 2026, iti Agoo Civic Center.
Panggep ti programa ti mangipaay iti pinansial a tulong kadagiti mannalon ken mangngalap a naapektaran iti nadumaduma a parikut iti agrikultura ken panagkalap, pakairamanan ti epekto ti agbaliwbaliw a paniempo, umad-adu a gastos iti produksion, ken dadduma pay a karit iti pagbiagda.
Segun iti lokal a gobierno, maparegta ti amin a mannalon ken mangngalap a makiuman iti bukodda a barangay tapno mapasingkedan no karamanda iti opisial a listaan dagiti benepisiario ken tapno maammuanda ti bukodda nga iskediul ti panagiwaras. Napateg met a suroten ti naikeddeng nga oras ken proseso para iti naannayas ken napardas a pannakaiwaras ti tulong.
Mabalakadan pay dagiti benepisiario nga itugotda dagiti kasapulan a dokumento kas iti valid identification cards ken dadduma pay a mainaig a papeles a mabalin a kiddawen iti aldaw ti pannakaiwaras para iti umno a pannakapaneknek ti kinasiasinoda.
Kabayatanna, impanamnama ti lokal a gobierno a nakasagana dagiti maseknan nga ahensia ken personnel a mangipasigurado iti naannayas, organisado, ken natalged a pannakaipatungpal ti pannakaiwaras ti subsidy kadagiti kualipikado a benepisiario iti ili ti Agoo. (Report by Bombo Ericka)
