BR LA UNION – Bimmisita ti baro a Regional Director ti Police Regional Office 1 (PRO1), iti La Union Police Provincial Office (LUPPO) idi kalman, Huwebes, Mayo 14, 2026.
Impaganetget ni Acting Regional Director PBGEN Jovencio S. Badua Jr. , a naka-pokus iti panangpapigsa kadagiti programa ken kampanya a mangparmek ti naduma-duma a kita ti kriminalidad, ken kasapolan met a mapapigsa ti puwersa dagiti otoridad ti rehiyon.
Inyuswat na ti maysa a programa nga A.L.E.R.T.O. maysa nga istratehiya a naka-pokus iti accurate mapping, coordination, ken proactive planning tapno masiguro nga amin a police unit ket agtalinaed ti kabaelan da a mangkontrol ti garaw dagiti suspek iti maysa a krimen ken mamantinir iti peace and order iti bukod a hurisdiksiyon.
Impaganetget ni Badua a saan nga aramiden a konsepto laeng ti A.L.E.R.T.O. ngem ketdi pagbalinen a kultura.
Tarigagay na a tunggal pulis iti Rehiyon Uno ket nasken nga agbalin nga alerto iti anyaman a pangta, agbalin nga alerto iti tunggal pagrebbengan, ken agbalin nga alerto iti kasapolan dagiti umili.
Malaksid dayta, napateg a mapapigsa pay ti police visibility wenno presensiya ti puersa ti pulisya iti komunidad tapno agbalin a mas natalged ti publiko.
Kabayatanna, kayat ti opisyal nga ipangruna ti seniority iti uneg ti organisasyon, nangruna iti panangipatungpal dagiti police operation, deployment, tasking, tapno agbalin nga epektibo ken agballaygi ti anyman nga operasyon dagitoy.
Itandudo pay ni PBGEN Badua iti panagbalin a disiplinado ti tunggal pulis.
Kayat na a tunggal pulis ket aramiden da a nasayaat ti pagrebbengan da ken saan nga agaramid kadagiti maikaniwas iti pagannurotan ken pagallagadan ti PNP.
No kasapulan kunana nga ikkaten dagiti rinuker wenno rebelyus a pulis iti serbisiyo, aramidenna daytoy tapno mataginayon ti integridad ken kredibilidad ti organisasyon.
Opisyal a nag-assume ni General Badua kas Acting Regional Director iti Police Regional Office 1 (PRO 1) idi May 9, 2026.
Sinukatanna ni Police Brig. Gen. Dindo R. Reyes, nga ita ket head iti Directorate for Comptrollership, maysa a PNP unit a responsable para iti financial management, budgeting, ken resource utilization.
Sakbay ti pannakadutok na iti PRO-1, nagserbi ni Badua kas hepe iti Police Regional Office 4-B (Mimaropa), nagbalin pay a head ti PNP Maritime Group.
Immunan a nagserbi ni Badua kas deputy regional director for administration ken spokesperson iti PRO-1, nagbalin pay a director iti Ilocos Sur Police Provincial Office, deputy regional director for operations idiay Police Regional Office-2 (Cagayan Valley).
Miyembro ni Badua ti Philippine National Police Academy Sandigan Class of 1994 ken tubo ti Bacnotan, La Union.
