BR LA UNION – Dinipensaan ni Senador Robinhood Padilla iti pada na a senador a ni Senador Ronald “Bato” Dela Rosa kalpasan a sinalodsod ti media ti maipapan iti maipagarop a paglem-lemmengan na, iti laksid ti arrest warrant ti International Criminal Court (ICC).
Iti interview idi kalman, Lunes, Mayo 18, imbaga ni Padilla a ti ammo na ket saan a kayat ni Dela Rosa a “makidnap,” kas sungbat iti salodsod nu apay a saan nga agpak-pakita.
Daytoy ti umuna a public appearance ni Padilla sipud idi Huwebes, idi naipadamag a maipagarop a kadwa na ni Dela Rosa a pimmanaw idiay Senado, sumagmamano nga oras kalpasan ti insidente ti pammaltog iti uneg ti senado.
Nagkedked metten ni Padilla a kumpirmaren nu isuna mismo ti nagmaneho wenno nangitulod kenni Dela Rosa a rimwar idiay Senado, ngem imbaga na a sumungbat iti amin a salodsod iti umno nga imbestigasyon.
Pinaglibakan pay ni Padilla iti report a maipagarop a nakita ni Dela Rosa idiay Ninoy Aquino International Airport wenno pimmanaw a naglugan ti yate.
Segun kenkuana, saan a naingkalintegan nga agpakita iti nasao a lugar nu adda intensyon na a pumanaw ditoy pagilian.
