Bilang dagiti nagparehistro iti insayangkat ti COMELEC a voter’s registration, dimmanon ti nasurok 5-M

Dumanon ti nasurok 5.4-M nga botante iti intero a pagilian iti nagparehistro iti naisayangkat a voter’s registration manipud October 2025 aginggana idi Lunes, May 18, 2026.

Iti inruar a datos ti Commission on Elections (COMELEC) Election and Barangay Affairs Department (EBAD), kaadduan kadagiti nagparehistro ket dagiti babbai a dumanon ti nasurok 2.8-M a nangatngato maiyarig iti 2.6-M na bilang a bilang dagiti lallaki a nagparehistro.

Manipud iti pakabuklan a bilang, kaadduan ket manipud idiay Region IV-A (CALABARZON) a dumanon ti nasurok 887,000; Region III – 613,000; National Capital Region (NCR) – 598,000; Region V – 322,000; ken Region VII – 316,000.

Kabayatanna, nailista met iti kababaan a bilang dagiti nagparehistro idiay Cordillera Administrative Region (CAR) a dumanon laeng iti nasurok 75,000.

Nagkiddaw met ti dispensa ni Comelec Chairman George Garcia kadagiti nakarana ti cut-off ti voter’s registration idi Lunes kadagiddan ti panangallukoyda a sapaen ti agparehistro inton sumaruno a tawen ken saanen nga urayen iti maudi nga aldaw ti panagrehistro.###