Naka-schedule nga idatag ita nga aldaw ti Huebes, Mayo 21, iti Justice Sector Coordinating Council ti maysa manen a Justice Zone da ditoy probinsya ti La Union nga addaan ti tema nga “Hustisya a Nabileg, San Fernando a Nalinteg.”
Nakapamaysa iti Justice Sector Coordinating Council wenno JSCC a mangpapigsa kadagiti addang tapno mapasayaat ti criminal justice system ditoy Pilipinas babaen iti naan-annayas a koordinasyon ti nagbaetan ti Department of Justice, Department of the Interior and Local Government, ken iti Korte Suprema.
Iti pannakiuman ti Bombo Radyo La Union kenni Honorable Nyerson Dexter Tito Q. Tualla, Convenor ken Executive Judge ti Regional Trial Court Branch 28, ket kinunana a ti konseho ket mangpapartak, ken pagbalinen nga episyenete ti proseso iti hustisya babaen ti panagkissay kadagiti pannakatantan ti panagresolbar ti kaso, panag-decongest kadagiti kaso ti korte ken pagbaludan, kasta met iti panagpangato iti talek ti publiko iti sistema ti hustisya.
Maysa kadagiti kangrunaan a programa ti JSCC ket ti panangidatag iti Justice Zone. Daitoy ket lokal a lugar iti reporma, nu sadinno ket agtitinnulong dagiti kameng ti pulisya, piskal, korte, pagbaludan, ken lokal a gobierno tapno mapasayaat iti panangiggem kadagiti kaso manipud iti imbestigasyon agingga iti pannakaresolbar da iti korte.
Napili iti La Union, partikular ti Ciudad ti San Fernando a sumaruno a pakaidatagan ti Justice Zone program agsipud ta nakitaan ti lugar iti kabaelan ken kinasagana kadagiti local justice institutions a mangipatungpal kadagiti koordinado a reporma ti hustisya.
Dinakamat ni Judge Tualla a makatulong ti Justice Zone tapno mapasayaat ti komunikasyon ken panagbalin nga episyente dagiti institusyon ti hustisya, nga agresulta iti naan-annayas a serbisyo ken patas a panangiggem ti kaso para kadagiti umili.
Ti City of San Fernando Justice Zone ket maika-20 paylaeng a Justice Zone a maidatag iti intero a pagilian babaen ti nationwide justice reform program iti Justice Sector Coordinating Council.
