Iti panaglukat ti DOH Wellness Clinic idiay Robinsons Place La Union, naibaga dagiti opisial no kasano a masigurado ti privacy ken confidentiality dagiti pasyente, nangruna kadagiti agpakonsulta iti mental health, family planning ken HIV services uray pay no adda iti uneg ti maysa a commercial mall.
Segun iti Department of Health, masurot ti klinika iti probisyon ti Data Privacy Act tapno maprotektaran dagiti sensitibo nga impormasion dagiti pasyente. Inlawlawag ni Dr. Glenn Matthew Baggao DOH Undersecretary a nakipagkoordinar ti DOH ken ti Ilocos Training and Regional Medical Center iti pamunuan ti mall tapno mangipaay iti pribado a lugar a pagdausan dagiti konsultasion.
Kinuna pay ni DOH Undersecretary Baggao a siguradoen ti ahensia a awan ti sabali a makaammo kadagiti personal nga impormasion no di ket ti doktor ken ti pasyente laeng.
Makita met iti uneg ti DOH Wellness Clinic ti naisagana a private consultation area a mangipaay iti kapanunotan ken talged kadagiti agpakonsulta, lalo kadagiti kaso a mayannatop iti mental health, family planning ken HIV concerns a masapul ti nainget a confidentiality.
Nupay kasta, impaganetget met dagiti opisial a masapul a maallukoy ken masanay dagiti clinic staff ken mall personnel iti husto a pannakaasikaso kadagiti sensitibo nga impormasion tapno mapagtalinaed ti dignidad, seguridad ken kinapribado ti tunggal pasyente. (Report by Bombo Lorie)
