Nagpanawagan ni Parañaque 2nd District Representative Brian Yamsuan ti madagdagos a pannakaipasa ti singasing a Cybersecurity Act tapno masalakniban ti critical information infrastructure ti Pilipinas.
Ti panawagan iti mamanday-linteg ket kasaruno iti pakdaar manipud International Monetary Fund (IMF) seknan ti kumarkaro a cyber attacks ti sangalubongan a financial system iti kangitingitan ti panagsaknap ti artificial intelligence (AI).
Inyarig na ti napasamak a breach ti Canvas, maysa a global learning management system a maus-usar kadagiti unibersidad ken dadduma pay nga educational institutions, pakairamanan ti Pilipinas.
Maysa pay ket ti waragawag manipud Armed Forces of the Philippines (AFP) seknan kadagiti agtultuloy a cyber attacks mainaig ti isyu idiay West Philippine Sea (WPS).
Segun kenni Yamsuan, saan laeng a babassit nga insidente ti agur-uray a ma-hack nu saan a maipasa kas linteg ti singasing , nu ketdi, agraman dagiti sensitibo nga impormasyon dagiti kritikal a serbisyo ken programa.
Innayon na nga idi Setyembre 21 ken 22 iti napalabas a tawen ket nailista ti Department of Information and Communications Technology (DICT) ti aganay 1.4-M hack attempts iti website ti gobierno.
