BR LA UNION – Balligi a naisayangkat ti Philippine Statistics Authority (PSA) – La Union Provincial Statistical Office, kabbinulig ti Local Government Unit (LGU) ti Agoo, La Union, ti pannakaited ti Certificate of Live Birth in Security Paper (SECPA) kadagiti siam a benepisiario manipud iti nadumaduma a barangay iti ili ti Agoo idi Mayo 26, 2026.
Indauluan ti aktibidad ni Chief Statistical Specialist (CSS) Dr. Danites E. Teñido ti PSA-La Union, katinnulong ti Local Civil Registry Office (LCRO) ti Agoo nga idauluan ni Municipal Civil Registrar Maria Corazon Padilla. Karaman kadagiti benepisiario ti programa ket dagiti residente manipud iti barangay ti Santa Ana, San Vicente Norte, ken Nazareno.
Naisayangkat ti nasao nga aktibidad babaen ti Birth Registration Assistance Project (BRAP), maysa a programa ti PSA a panggepna ti mangipaay iti legal ken opisial a pakabigbigan dagiti Pilipino a saan pay a nairehistro ti pannakayanakda.
Malaksid iti panangipaay ti Security Paper birth certificates, nangisayangkat pay ti PSA ken ti Local Civil Registry Office (LCRO) iti mobile registration activity para kadagiti aplikante nga addaan kompleto a dokumento tapno maproseso ti late registration of birth-da. Panggep daytoy a mapasayaat ti proseso ti panagrehistro nangruna kadagiti umili a marigatan a makadanon iti civil registry office.
Segun iti PSA, ti kaadda ti rehistrado a pannakayanak ket napateg nga addang para iti maysa nga indibidual tapno makastrek iti nadumaduma a serbisio ti gobierno kas iti edukasion, serbisio ti salun-at, panggedan, ken dadduma pay a legal a transaksion.
Naballigi ti aktibidad babaen ti tulong ni Registration Officer II Girard Francis Casuga kas focal person ken BRAP Coordinator Julius Caesar Abenoja, agraman ti sibubukel nga staff ti LCRO Agoo.
Agtultuloy ti panangitandudo ti PSA kadagiti lokal a gobierno iti BRAP tapno madanon dagiti adda iti marginalized sectors, indigenous peoples (IPs), Muslim Filipinos, ken dadduma pay a napanglaw a sektor nga awan pay ti opisial a dokumento ti pannakayanakda.
Babaen kadagiti kastoy a programa, ad-adda a papigsaen ti gobierno ti panggepna a mangipaay iti ad-adda a nairaman ken madanon a serbisio publiko para kadagiti amin nga umili. (Report by Bombo Ericka)
