BR LA UNION – Binigbig ni Congressman Paolo Ortega, Representante ti Umuna a Distrito ti La Union, ti kinapateg ti panaglaban iti misinformation ken disinformation iti social media iti tengnga ti napaspas a panagdur-as ti teknolohiya ita a tiempo.
Segun kenni Ortega, nupay adda cyber law iti pagilian ken nainget daytoy, masapul latta ti legal nga aksion tapno makaurnong ti umdas nga ebidensia kontra kadagiti mangiwarwaras ti saan a pudno nga impormasion online.
Inlawlawagna pay a saan laengen nga Artificial Intelligence wenno AI ti kalaban dagiti tattao ita, no di ket uray dagiti bots a maus-usar iti panangiwaras ti fake news.
Kinunana a mapaneknekan daytoy babaen ti report ti Department of Information and Communications Technology wenno DICT a mangipakita iti operasion dagiti dadakkel a troll farm a mangiwarwaras ti saan a pudno nga impormasyon iti internet.
Nakabutbuteng pay, segun kenkuana, dagiti malware a maikabil kadagiti computer a nupay adda anti-virus ken napatayen ti computer ket agbibiag manen iti sumaruno nga aldaw no malukatanen ti device.
Inlawlawagna a kasla “zombie” dagiti bots ta mabiabiag da manen tapno mang-atake iti online platforms gapu iti na-sophisticated a teknolohiya a maus-usar ita.
Nupay kasta, namnamaenna a kabaelan latta ti publiko a maammiris no ania ti fake news ken trolls laeng iti social media.
Innayon na pay a nga ammo dagiti tattao a saan a pudno dagiti sumagmamano nga impormasion online ken no dadduma isu katkatawaanda laengen, agsipudta dakkel latta ti reach, shares, reactions ken engagements dagitoy iti social media.
Dinakamatna pay nga ammo metten ti publiko a mabalin a magatang uray dagiti social media engagements tapno agparang a popular wenno mapagtalkan ti maysa nga impormasion.
Gapuna, impaganetget ni Ortega a masapul a labanan ti misinformation ken disinformation babaen iti ad-adu ken husto nga impormasion ken legal nga aksion no kasapulan. (Report by Bombo Jordan)
