Pinaayaban ti European Union ken dagiti sumagmamano a pagilian ti Europa dagiti pannakabagi ti Russia kalpasan nga impangta ti Moscow iti posible a panangraut iti Kyiv ken nangtignay kadagiti ganggannaet, agraman dagiti diplomatiko, a nagbakwit ti kabesera ti Ukraine.
Karaman kadagidiay nangayab kadagiti pannakabagi ti Russia ket ti Alemania, Norway, Netherlands, Poland, ken Sweden, kasaruno ti panagibaga ti Russia a puntiriana dagiti pasilidad ti militar ken decision-making centers idiay Kyiv.
Segun ti diplomatic service ti EU, pinaayabanda iti Russian chargé d’affaires tapno ipeksa iti nainget a panagkontra iti inawaganda nga unacceptable escalation, ken impaganetget nga agtalinaed iti delegasion ti EU idiay Kyiv iti laksid ti tension.
Idiay Norway, napaayaban ni Russian Ambassador Nikolai Korchunov tapno ilawlawag dagiti maipagarup a nalawag a pangta kadagiti ganggannaet a personnel idiay Ukraine.
Iti sabali a bangir, nagpanawagan iti Poland ti dagos a panangisardeng iti inawagan daytoy nga “unlawful agression” ti Russia.
Kabayatanna, inlibak ti embahada ti Russia idiay Alemania dagiti alegasion ken tinakderan a “surgical strikes” laeng iti ar-aramidenda kontra kadagiti puntiria ti militar.
Kinuna ti Moscow a ti naiplano nga operasion ket kas sungbat kadagiti maipagarup a panangraut dagiti terorista ti Kyiv, agraman ti maysa nga insidente idiay Luhansk a nakatayan ti 21 a tattao—maysa a waragawag nga inlibak ti Ukraine, a nangibaga a ti target ket maysa a Russian drone unit.###
