Posible a tallo a senador manipud majority ti makitkita nga umakar iti minority bloc inton sumaruno a lawas.
Daytoy ti makitkita ni Senador Erwin Tulfo iti tengnga dagiti sayangguseng a sabali manen a panagbalbaliw ti liderato iti Senado ken ti agtultuloy a panangidagadag ti minoria a mangyakar iti sumagmamano a mammanday-linteg iti ranggoda.
Kinuna ni Tulfo a nakitada daytoy a posibilidad a nakabasar iti body language ti sumagmamano a kameng ti majority bloc ken ti nalawag a kaawan ti plenario idi agsusupiatda maipapan iti video conferencing bayat ti sesion idi rabii ti Martes, a nagresulta iti panag-walkout dagiti minority members.
Saan nga imbaga ti senador no siasino dagiti tallo a kameng ti mayoria a mabalin a makisarita tapno umakar iti minoria.
Nupay kasta, dinakamatna a dua kadagiti senador manipud majority ti adu ti gagayyemna iti oposision, da Senador Loren Legarda ken Senador Francis “Chiz” Escudero.
No mapasamak daytoy, mabalin nga agbalin iti minoria a majority bloc.
Impasigurado ni Tulfo a “100 porsiento” a natalged ti liniada ken awan ti agrupsa manipud iti Solid Bloc 11 wenno SB11.
