Inaklon ti Department of Education (DepEd) iti literacy crisis ditoy pagilian kalpasan a rimuar iti maysa nga assessment a 87 percent kadagiti Grade 11 students ti marigatan pay laeng a mangtarus wenno awaten iti basbasaenda.
Segun iti DepEd, pakakitaan daytoy iti nabayagen a learning gaps iti sistema ti edukasyon ditoy Pilipinas ken saan laeng a problema ti senior high school.
Iti palawag ni DepEd Undersecretary for Learning Systems Carmela Oracion, impaganetget na a seryoso ti ahensia iti resulta manipud ti Second Congressional Commission on Education (EDCOM 2).
Inlawlawag ni Oracion a naurnong ti problema iti abilidad nga agbasa sipud pay idi umuna a grado ken kimmaro gapu iti kinapanglaw, kinakurang ti learning materials, limitado a suporta iti pagtaengan, pannakaitantan iti klase, ken epekto ti pandemia.
Kenunana, saan a maymaysa iti rason ti krisis iti literacy no di ket sistematiko a problema iti edukasion ditoy pagilian.
Kas sungbat, nangipatungpal ti DepEd iti summer remediation program para kadagiti senior high school students a naikeddeng nga agpatingga ita a lawas.
Isagsagana met ti ahensia dagiti baro a literacy assessment sakbay ti pannakalukat ti klase tapno mailasin dagiti estudiante a kasapulan ti kanayunan a suporta ken tutoring.
Mairaman met iti baro a three-term school calendar iti remediation ken enrichment activities tapno nasaysayaat a mataming iti learning gaps iti intero nga school year.
Inaklon pay ti DepEd nga agtaltalinaed a karit iti nadagsen a workload dagiti mannursuro iti laksid dagiti maipatpatungpal a reporma.###
