Agtalinaed nga alerto ti Bureau of Fisheries and Aquatic Resources Regional Office 1 (BFAR-1) para iti masungad a panawen ti panagtutudo tapno masigurado ti kinasagana ken kinatalged dagiti mangngalap ken proyekto ti panagkalap iti rehion.
Agtultuloy ti panangitandudo ti ahensia kadagiti nadumaduma a information ken education campaign tapno maipaayan dagiti mangngalap iti umdas a pannakaammo maipapan kadagiti posible nga epekto ti dakes a panawen ken dagiti addang a nasken nga aramiden tapno masalakniban ti pagbiagda.
Segun ken ni Dr. Remely Lachica – Regional Director ti BFAR-1, napateg a dagiti mangngalap a mangrugin nga agikabil wenno ag-stock iti ikan kadagiti fishponds ket addaan iti maitutop a safety measures tapno maliklikan ti dakkel a pannakapukaw no adda napigsa a tudo, layus, wenno dadduma pay a kalamidad. Dagiti mairekomendar nga addang ket pakairamanan ti umno a panagpili kadagiti lugar ti proyekto, regular a panangmonitor iti kasasaad ti panagkalap, ken panangpapigsa kadagiti pasilidad tapno makaandur kadagiti epekto ti panawen ti panagtutudo.
Maigiddato iti dayta, mangisayangkat met ti ahensia kadagiti panagsanay a mainaig iti Disaster Risk Reduction and Management (DRRM) tapno mapalawa ti pannakaammo dagiti mangngalap iti umno a panagsagana, panangliklik iti peggad, ken napartak a panagimbag manipud kadagiti didigra.
Impaganetget pay ti BFAR-1 ti kinapateg ti naannad a panagplano iti pannakaipatungpal dagiti proyekto iti panagkalap. Segun iti ahensia, nasken a siguraduen a maibagay ken natalged ti lokasion ti proyekto tapno naballigi ken agpaut dagiti investments ken interventions a naaramid.
Kabayatanna, agtultuloy met ti panangisayangkat ti BFAR-1 kadagiti programa ti rehabilitation para kadagiti mangngalap a naapektaran iti kalamidad. Ipasigurado ti ahensia a mairaman dagiti kualipikado a benepisiario kadagiti programa a makatulong a mangbangon manen iti pagbiagda.
Malaksid iti direkta a tulong, ipamaysa pay ti BFAR-1 ti panangipaay iti livelihood projects kas iti land-based livelihood projects, fish processing, fish trading, ken marketing assistance iti babaen ti KADIWA Program. Babaen kadagitoy a programa, ad-adu ti gundaway dagiti mangngalap a mangpaadu iti matgedan ken direkta a mangilako kadagiti produktoda iti merkado.
Inlawlawag pay ti ahensia a ti pannakaiwaras dagiti proyekto ken interventions ket kadawyan a maaramid babaen kadagiti fisher organizations wenno asosasion tapno ad-adu ti magunggonaan a tattao ken mapalawa ti sakup dagiti programa.
Mainayon pay, agtultuloy ti panangparegta ti BFAR-1 iti insurance dagiti proyekto babaen ti crop and fisheries insurance tapno maited ti kanayonan a proteksion kadagiti benepisiario kontra iti posible a pannakadadael gapu kadagiti kalamidad.
Iti kastoy a wagas, maaddaan dagiti mangngalap iti suporta ken gundaway a makasubli no bilang maapektaran ti pagbiagda ken proyektoda iti panagkalap. (Report by Bombo Ericka)
