Mangnamnama dagiti kongresista a marisut dagiti Senador ti problema iti nagbaetan ti mayorya ken minorya tapno maaddaanen ti quorum ken makaisayangkat dan ti plenary session.
Para kenni House Deputy Speaker ken La Union Representative Paolo Ortega, makapaliday nga adda iti saan a panagtitinnunosan dagiti Senador, nangruna ket dua nga aldaw laengen sakbay iti ‘sine die adjourment,’ nu sadinno ket adu paylaeng dagiti agur-uray a singasing a linteg a nasken a maipasa.
Innayon pay ni Ortega nga ur-urayen metlaeng dagiti umili a Pilipino ti pinal a kalendary wenno schedule para ti impeachment trial kontra kenni Bise Presidente Sara Duterte.
Kabayatanna, kinuna met ni House Prosecutor ken Bicol Saro Party-list Rep. Terry Ridon a napateg nga agkakadwan dagiti Senador tapno magun-od ti kasapulan a quorum ti sesyon ken maaramid iti pagrebbengan da a trabaho.
Dinakamat ni Ridon a kasapulan met laeng ti nasao a quorum para ti panag-akem ti Senado a kas impeachment court.
