Nangisayangkat idi kalman, Hunio 3, 2026, ti foot patrol ken bandillo operations dagiti personnels ti City of San Fernando Police Station (PS), kabinnulig dagiti Barangay Tanod ti Barangay San Francisco iti kabaybayan ti Acapulco Beach iti Barangay San Francisco, Siudad ti San Fernando, La Union.
Iti nasao nga aktibidad, pinarang-ay dagiti pulis ken Barangay Tanod iti panagparangda iti publiko ken panangipatungpalda kadagiti programa para iti kinatalged ti komunidad babaen ti panangipalagip kadagiti umili ken bisita nga agannadda gapu iti agdama a saan a nasayaat a kondision ti tiempo.
Binalakadanda dagiti umili ken turista a liklikanda ti panaglangoy wenno panagturong kadagiti lugar iti baybay nga adda madi ken napigsa nga dalluyon. Impalagip met kadakuada a kanayon a suroten dagiti weather advisories ken dagus a tumulnog kadagiti bilin ken pagannurotan nga ipaay dagiti otoridad.
Segun iti pulisya, daytoy a naipasdek nga inisyatiba ket panggep a mapabileg iti pannakaammo ti publiko, panangliklik kadagiti insidente a mabalin a maiturong iti saan a nasayaat a tiempo, ken panangisiguro ti talged ken kinatalged dagiti umili ken turista a mapan iti baybay iti panawen ti madi a kondision ti tiempo. (Report by Bombo Jordan)
