Opisial nga inpadamag ti Miss Grand International (MGI) Organization iti panaglukat ti aplikasion daytoy para iti maikadua a season ti MGI All Stars, iti global pageant a tampok dagiti sigud a nakipaset ti nadumaduma nga international beauty competitions.
Segun ti organisasion, mangrugi iti aplikasion inton bigat, Hunyo 6, 2026, alas-otso ti rabii. Panggep ti kompetision nga ikkan ti gundaway dagiti seasoned pageant veterans manipud kadagiti nadumaduma a pagilian.
Silulukat ti MGI All Stars kadagiti babbai nga agtawen ti 20 agingga 40, uray addaan ti asawa wenno anak, karaman met dagiti transgender women, basta simmali kadagiti international pageant.
Iti umuna nga edision ti kompetision, nakoronaan ni Vanessa Pulgarin ti Colombia, sigud a semifinalist ti Miss Universe, kas grand winner iti finals a naangay iti MGI Hall idiay Bangkok idi Mayo 30.
Napangabakan ni Pulgarin ti $100,000 ken addaan gundaway nga ilaban ti korona-na iti sumaruno a season, a mabalin a mangidanon ti pakabuklan a premyo ti agingga $1 million no kaspangarigan mangabak ti tallo a nagsasaruno nga edision.###
