BR LA UNION – Nainget a pinaglibakan ni House Impeachment Prosecutor Rep. Terry Ridon, iti akusasyon dagiti nabirngasan nga 18 ex-marines a maipagarop nga immawat dagiti taga-usig wenno house prosecutors iti naka-maleta a kuwarta.
Impaganetget ni Ridon a kina-ulbod dagiti nasao a waragawag ken naigagara tapno dadaelen iti kredibilidad ti House prosecution panel sakbay a mangrugi ti impeachment trial kontra kenni Vice President Sara Duterte.
Innayon na a saan met a nadakamat ti naganna iti orihinal nga affidavit ti grupo idi Pebrero 2026.
Kas pammaneknek nga awan kinapudno na iti akusasyon, nangipakita ni Ridon ti maysa a maleta iti publiko a naglaun iti mangga ken peluka.
Impaganetget pay ni Ridon ken dadduma pay a kakadwa na iti House prosecution panel a ti naisayangkat a panagdengngeg idiay Senado seknan ket maysa a kita ti demolition job ken taktika tapno tikawen ti publiko ken dadaelen ti talek iti grupo da sakbay a mangrugi ti panagusig idiay Senado.
Nakatuding a mangrugi iti pre-trial bayat a ti pormal a panagusig wenno trial proper ket inton Hulyo 6, 2026.
Nakasagana metten ti Prosecution Panel para iti maisayangkat a pre-trial conference kalpasan ti panangidatag ti sungbat ni Vice President Sara Duterte iti uppat nga Articles of Impeachment idi Hunyo uno.
Immunan nga imbaga ni Batangas Rep. ken Prosecution Panel Head Rep. Ginky Luistro a ti pre-trial conference ket maysa a simple a presentasyon dagiti ebidensya ken testigo a mabalin nga isango inton madanon ti pormal nga impeachment trial.
Siniguro met ni Ridon a tuloy iti panagusig laksid kadagiti pammadakes ken nakasagana da nga idatag amin a natibker nga ebidensya, kabilang iti report ti Anti-Money Laundering Council (AMLC) kontra Bise Presidente.
