Nagpalagip ti Department of Health (DOH) iti publiko nga agbalin a nasipot kadagiti sakit a kadawyan a ngumatngato iti kaso tunggal panagtutudo, karaman dagiti water-borne diseases, influenza-like illnesses, leptospirosis, ken dengue wenno ti maaw-awagan a “W.I.L.D.” diseases.
Segun kenni DOH spokesperson Assistant Secretary Albert Domingo, napateg a dagos nga agpakonsulta iti kaasekgan nga health center dagiti tattao a timmapog iti layos tapno makaliklik kadagiti posible a komplikasion iti salun-at.
Kagiddan ditoy, ilunglungalong ti ahensi ti kampanya a “4Ts” kontra dengue tapno malappedan iti panagado ti lamok a mangpatpataud ti sakit.
Karaman iti kampanya ti Taob wenno iti panangbaliktad dagiti containers a mabalin a maurnongan ti danom; Taktak wenno panangikkat ti naurnong a danom kadagiti banag a mabalin a pagbalayan ti lamok; Tuyo wenno panangpatalinaed a namaga ti aglawlaw babaen ti panangikkat dagiti nakatiwangwang a danom; ken Takip wenno panangakkob kadagiti pagurnungan ti danom tapno saan daytoy a pagbalayan dagiti lamok.
Ipalpalagip met ti ahensia a kadawyan a kumagat dagiti dengue mosquitos manipud alas-sais agingga alas-otso ti bigat ken alas-kuatro agingga alas-sais ti sardam.
Maibasar ti datos ti DOH, nakailist iti pagilian ti 50,727 a kaso ti dengue manipud Enero agingga Mayo 2026. Nababbaba daytoy ti 56 porsiento maiyarig iti 114,308 a nailista a kaso iti kapada a panawen idi napalabas a tawen.
Bayat nga agtultuloy iti panagtudo, inallukoy ti ahensia iti publiko a regular nga i-monitor daggiti weather update, agusar ti payong, kapota wenno bota ni rumuar iti balay, ken siguraduen a nalinis ken natalged iti in-inumen a dano.###
