Naarestaren ti pugante ken sigud a Police Lt. Col. Rafael Dumlao III ita nga aldaw, Hunyo 9, mainaig iti kidnapping ken pammatay iti South Korean businessman a ni Jee Ick Joo idi 2016.
Daytoy ket kalpasan ti sangapulo a tawen a panaglemlemmeng na kasaruno ti nairuar nga Interpol Red Notice ken nainget a manhunt ti Philippine National Police (PNP).
Segun kenni Interior and Local Government Secretary Jonvic Remulla, inserbi dagiti operatiba ti PNP iti warrant of arrest kontra kenni Dumlao iti maysa a pagtaengan idiay Quezon City.
Na-dismiss ni Dumlao manipud iti serbisio idi 2018 ken na-convict mainaig iti kidnapping, extortion, carnapping, ken pammapatay kenni Jee Ick Joo, maysa a South Korean businessman a nadukot ken napapatay iti uneg ti Camp Crame idi Oktubre 2016.
Segun kenni Remulla, maysa a saksi iti kaso ti tummestigo a ni Jee Ick Joo ket na-kidnap ken nakikilan ti kwarta. Idi napaay iti biktima nga ited iti makidkiddaw a kwarta, maipagarup a nabekkel daytoy ken inuram ti bagi na.
Idi Setyembre 2024, binaliwan ti Court of Appeals iti desision ti lower court, natakuatan a guilty ni Dumlao, nasentensiaan ti reclusion perpetua, ken inbilin ti dagus a pannakaarestar na nga awanan ti pyansa.
Idi napalabas a bulan, nangiruar iti Interpol ti Red Notice kontra kenni Dumlao, ken nangidiaya iti PNP ti ₱1 million a pabuya para iti impormasion maipapan iti lokasion na.
Iti kauddian nga operasion ita nga Hunyo 2026, nasurutan ken naarestar isunan dagiti otoridad.
Ti pannakakemmeg na ket makitkita a napateg nga addang iti panangipaay ti hustisya iti kaso ni Jee Ick-Joo, a nangigubuay ti nakaro a gura ti publiko ken nangpataud ti panawagan para iti naing-inget a pagsungbatan dagiti pulis.
Manamnama a sumango manen ni Dumlao iti panagusig para kadagiti non-bailable a kaso na, ken namnamaen ti pamilya ti biktima a magun-od dan iti hustisia kalpasan ti naunday a panawen a panaguray.###
