Naipatulod iti umuna a gundaway dagiti presko a mangga ti Giumaras idiay Europa ken Hong kong kas paset ti panangpalawa ti sangalubongan a merkado para iti produkto ti Pilipino, segun ti Department of Agriculture (DA).
Pakabuklan a 200 kilos ti mangga manipud Kokomojo Mango Farm iti naipatulod, 100 para idiay Hong Kong ken tig-50 kilo para idiay Belgium ken Netherlands.
Mausar dagiti mangga idiay Europa kas pang-promosyon a panangbigbig iti merkado, bayat a maisagana iti suplay idiay Hong Kong iti panagrambak ti maika-127 nga Aldaw a Panagwaywayas wenno Independence Day ti pagilian.
Inpasigurado ti Bureau of Plant Industry (BPI) a nakasurot iti produkto iti sangalubongan a pagalagadan iti food safety ken plant health babaen ti phytosanitary certification.
Segun kenni Agriculture Secretary Francisco Tiu Laurel Jr., makatulong iti panaglukat dagiti baro nga export market iti panagngato ti matgedan dagiti mannalon ken mangpartuat ti ad-ado a trabaho iti sektor ti agrikultura.###
