Nagsinnukat manen ti panagatake iti Estados Unidos ken Iran iti maikadua a nagsuro nga aldaw. Nagballaag ni U.S. President Donald Trump nga agtultuloy iti nalawa a panagpabettak no saan dagus nga umanamong ti Tehran iti ceasefire deal.
Nangrugi iti panagkaro ti tension kalpasan a napagsuwek iti maysa nga U.S. Apache helicopter asideg ti Strait of Hormuz, a nagrason ti nagsasaruno a panagraut idiay Iran ken dagiti base militar ti U.S. iti rehiyon.
Segun ti U.S. military, tinarget dagiti panagatake da iti military surveillance capabilities, communication systems, ken air defense sites kas sungbat iti maipagarup nga agresyon ti Iran.
Imbinglay ni Trump a temporario nga agsardeng dagiti panagraut ngem dagus daytoy a maituloy no saan nga agperma iti Iran iti maysa a katulagan iti Estados Unidos.
Kas sungbat, imbaga ti Islamic Revolutionary Guard Corps (IRGC) ti Iran a rimmaut daytoy kadagiti 18 U.S. military targets idiay Kuwait ken Bahrain, karaman ti Fifth Fleet ti U.S. Navy, ken pinuntirya manen ti al-Azraq air base idiay Jordan babaen ti 12 ballistic missiles.
Inwaragawag ti Kuwait ken Bahrain a nalapdan ti air defenses da dagiti aerial attack ti Iran.
Nagpakdaar met ti top joint military command ti Iran a paputukan daytoy iti aniaman a lugan pangbaybay a dumalan iti Strait of Hormuz, ngem inpaganetget ti U.S. Central Command nga agtaltalinaed a silulukat iti ruta pangbaybay. Nupay kasta, walo a barkoda iti natamaan.
Naipadamag dagiti panagbettak idiay Sirik, Kargan, Bandar Abbas, Minab, Karaj, ken Varamin kabayatan ti panangibaga ni U.S. Defense Secretary Pete Hegseth a panggep ti operasion a piliten iti Iran a makitulag tapno gibusan iti gubat.
Agtultuloy iti sinnukat ti opensiba iti laksid ti immuna a ceasefire ken dagiti napaay a negosasyon.
Idi Miyerkules, tinarget manen ti Estado Unidos dagiti air defenses ken radar sites iti aglawlaw ti Strait of Hormuz, bayat a bimmales iti Iran babaen ti missile ken drone attacks idiay Jordan, Kuwait, ken Bahrain. Segun ti maysa nga U.S. official, awan ti dakkel a perdision a pinataud ti nasao a panagraut.
Pinabasol ti Iran iti Estados Unidos ti panagatake kadagiti reservoir nga agsupsuplay ti inumen a danom kadagiti 10 a lugar. Inawagan daytoy ni foreign ministry spokesperson Esmaeil Baghei a maysa a war crime ken panaglabsing iti human rights.
Rinibon dagiti pimmusay iti gubat ken naapektara ti dandani maikalima a paset ti sangalubongan a suplay ti crude oil ken liquefied natural gas.
Agtultuloy a harharangan ti Iran iti Strait of Hormuz bayat nga agtaltalinaed iti blockade ti Estados Unidos kadagiti sangladan ti Iran.
Nagbalin met a karit daytoy iti White House gapu iti panagbaba ti approval ratings ti President Donald Trump ken panagamak dagiti sumagmamano a Republican a makaapektar daytoy iti midterm elections.
Kabayatanna, agtutuloy iti rinnupak idiay Lebanon iti nagbaetan ti Israel ken ti Iran-backed Hezbollah. Saan a bumaba iti 13 a tattao iti pimmusay gapu ti airstrikes ti Israel, bayat a nangiyusuat met ti panagraut iti Hezbollah.
Karaman kadagiti kidkiddawen ti Tehran iti panangisardeng ti panagatake ti Israel idiay Lebanon, panangikkat ti sanction kontra iti Iran, panangruk-at kadagiti frozen assets daytoy, ken panangbigbig iti kontrol da iti Strait of Hormuz.
Inpaganetget met ni U.S. President Donald Trump a rumbeng nga isardeng ti Iran iti panagirut iti shipping idiay Hormuz ken siguraduen iti aniaman a katulagan a saan daytoy a makaaramid ti nuclear weapon, nga agtultuloy da met a pagliblibakan.
