Nabigbig ti singer a ni Taylor Swfit kas kaubingan a babai a nakastrek iti Songwriters Hall of Fame iti edad a 36, a nangnayon pay kadagiti nagun-od na a balligi iti tay-ak ti musika.
Nagbalin a kualipikado isuna para iti nasao a panangbigbig 20 a tawen kalpasan a nairuar iti umuna a komersial a kantana a Tim McGraw idi 2006.
Addaan isunan ti 12 album ken 14 a Grammy Awards, karaman iti rekord nga uppat nga Album of the Year trophies.
Paset met kadagiti nainduct da Gene Simmons, Paul Stanley, Kenny Loggins, Alanis Morissette, ken Walter Afanasieff kas paset ti siam a baro a miembro ita a tawen.
Mapatta-patta a nalablabes ngem 250 million album-equivalent iti napastrekan ni Swift iti intero a lubong, bayat a ti Eras Tour na ket nakaur-or ti nasurok-kumurang dua bilyon a dolyar idi 2023 ken 2024.###
