Mapattapatta a 500 a rallyists iti nangisayangkat ti tignay-protesta iti nadumaduma a lugar idiay Manila ken Quezon City, segun iti Philippine National Police (PNP).
Nairekord ti PNP ti tallo nga agtultuloy a protesta idiay Manila ken maysa idiay Quezon City, idinto a nasapa a nagpatingga iti protesta idiay NHA Quezon City.
Segun kenni NCRPO PMajor Hazel Asilo, adda ti insidente ti bandalismo idiay Kalaw, Manila, maysa nga agtutubo iti nangisprey ti ulo ti maysa a polis a nakasibilyan ken timmakas idi nasita daytoy.
Nupay kasta, kinuna ni PMMajor Hazel Asilo nga awan pay ti nairekord a sabali pay a saan a nasayaat nga insidente mainaig kadagiti protesta.
Nasurok a 8,000 a polis iti indeploy ti NCRPO tapno masigurado ti seguridad, idinto nga impanamnama ti PNP a respetuenda ti karbengan iti nakappia a panangiwaragawag ken iparungna iti nangato a lebel ti panagteppel.###
