BR LA UNION – Nangipeksa ti sibubukel a suporta iti Armed Forces of the Philippines (AFP) kenni Defense Secretary Gilberto Teodoro Jr. kalpasan a pinawilan ti China a sumrek iti pagilian da ken makitransaksyon kadagiti Chinese entity, agraman pamilya na.
Segun kenni AFP spokesperson for the West Philippine Sea Rear Admiral Roy Vincent Trinidad, dagiti waragawag ni Teodoro ket simple a panangdepensa iti karbengan ken interes ti Pilipinas ken nalawag a nakabase iti internatinal law ken iti 2016 Arbitral Award.
Impaganetget pay ni Trinidad a ti sanctions ket maysa a gandat a pammutbuteng ken pagulimeken dagiti agibut-butaktak ti maipagarop nga ilegal ken nadursok nga aksyon ti China iti exclusive economic zone ti Pilipinas.
Iti sabali a waragawag, imbaga ti military a ti addang ti China ket saan laeng a laban kenni Teodoro ngem ketdi maysa a gandat a pakapsoten ti lehitimo a panangusar ti Pilipinas iti sovereign rights daytoy.
Siniguro ti militar nga agtultuloy iti ar-aramiden da a maritime ken aerial patrols, panangprotektar kadagiti mangngalap a Pilipino, ken panangisakit iti soberanya ken maritime rights ti pagilian idiay West Philippine Sea.
