BACNOTAN, LA UNION – Nangipaay iti Lokal a Gobierno ti Bacnotan, La Union ti school bags, school supplies ken playground sets kadagiti daycare learners ken Child Development Centers iti ili ti Bacnotan kas suporta ita baro nga school year.
Naisayangkat iti tinawen a panangipaay idi Hunio 13, 2026 a kagiddan ti ZumBacnotan, a pinasetan met dagiti ubbing a Bacnotanean.
Indauloan da Mayor Divine Fontanilla ken Vice Mayor Francis Fontanilla, kadua ti Municipal Social Welfare and Development Office (MSWDO), iti panangipaay dagiti school supplies para kadagiti estudiante iti amin a Child Development Centers iti intero a munisipyo.
Iti mensahena, impaganetget ni Mayor Divine nga iti panagsuro ken panagadal dagiti ubbing ket saan laeng a pagrebbengan dagiti mannursuro, no di ket maysa a panagtitinulong ti pamilya, komunidad ken eskuelaan.
Nakipaset met iti okaskon ni Sangguniang Bayan Committee Chair on Social Services Jane Gonzales ken dagiti Child Development Workers manipud kadagiti naduma-duma a barangay iti Bacnotan.
Segun iti lokal a gobyerno, agtultuloy dagiti programa iti sidong ti panangidaulo da Mayor Divine ken Vice Mayor Francis Fontanilla a mangipaay ti nasaysayaat a gundaway iti edukasion ken pannakapasayaat ti biag ti tunggal ubing a Bacnotanean.
Courtesy: Bacnotan, La Union (FB)
Report by:
Bombo Jordan Colcol
