BR LA UNION – Nakaurnong ti local a gobyerno ti San Fernando, La Union iti agarop 4,000 a kilo a recyclable waste materials babaen iti pannakaipatungpal ti “Palit Basura, Palit Bombilya, Palit Gulong Project” idiay Barangay Baraoas ken Barangay Cabarsican.
Segun iti City Environment and Natural Resources Office wenno CENRO, manipud iti 3,929 a kilo iti recyclable materials a nakolekta, adda iti 5,937 a botelya, 40 nga e-waste items (electronic waste), 193 a nausaren a bombilya ken 321 a da-an a pilid, a nasken a maipasidong iti umiso a recycling ken disposal.
Kasukat dagiti nasao a basura, naipaayan dagiti 70 a household wenno babbalay iti goods ken mula a fruit bearing trees a makatulong iti panagbiag dagiti residente.
Pakabuklan a 170 a mula ti naited kadagiti residente, a makatulong tapno mapapigsa iti kampanya a mangsalaknib iti aglawlaw manipud iti epekto ti climate change.
Ipakpakita ti proyekto a ti umiso a panagsegregate ken panag-recycle iti basura ket saan laeng a makatulong iti kinadalus ken kinapintas ti aglawlaw ngem ketdi mangted pay ti direkta a pagimbagan dagiti umili.
- Dagiti e-waste (electronic waste) ket dagiti dadaelen, da-an, wenno saanen a maus-usar nga arwaten a de-koryente (cord, cable, charger, fluorescent lamps ken LED bulbs) wenno baterya. Napateg a maibelleng a nasayaat dagiti e-waste babaen ti panag-recycle tapno maliklikan a maiwaras dagiti makasabidong a kemikal iti aglawlaw.
