Suksukimaten ti Department of Health (DOH) iti report ti maipagarup a salmonella outbreak iti National Center for Mental Health idiay Mandaluyong City.
Segun kenni DOH Spokesperson Undersecretary Albert Domingo, am-amwen ti ahensia dagiti detalye ti insidente.
Maibasar iti maysa a social media post, 18 a pasyente iti maipagarup ken nagpositibo iti salmonella a mapapati a naala manipud iti taraon a naited kadakuada.
Paset met iti alegasion a maipagarup nga adda ti angot dagiti karne a naidasar kadagiti pasyente ti Pavilion 19.
Segun ti World Health Organization (WHO), ti salmonellosis ket ingubuay ti Salmonella bacteria a mabalin a mangigubuay ti gurigor, panagsakit ti tiyan, diarrhea, panagulaw, ken panagbakwar.###
