BR LA UNION – Pimmigsa ti bagyo Francisco bayat nga umas-asideg iti Northern Luzon, ngem agtaltalinaed iti Philippine Sea ken saan pay a direkta a makaapektar iti kasasaad ti panawen ditoy pagilian.
Nupay kasta, posible a mangrugi a marikna iti napigsa a panagtudo iti Northern Luzon ken sumagmamano a paset ti western portion ti Luzon ken Visayas, gaputi enhanced Southwest Monsoon ken bagyo Francisco, inton bigat (June 22) wenno inton Martes (June 23).
Maibasar iti 11:00PM advisory ti PAGASA, naudi a nasaripatpatan ti sentro ti bagyo Francisco iti kaadayu nga 875 km daya ti Central Luzon.
Kabuyog ti angin a 130 km/h asideg iti sentro ken kapegges a dumanon iti 160 km/h.
Dupdupagenna iti laud amianan-a-laud iti kapartak a 25 km/h.
Iti agdama, awan pay ti nakangato a Tropical Cyclone Wind Signal iti sadinuman a paset ti pagilian.
Ngem posible a maingato ti Signal No. 1 iti sumagmamano a paset ti Cagayan, Babuyan Islands, ken Batanes inton bigat, Lunes, Hunyo 22, 2026.
Maibasar iti forecast ti state weather bureau, agtaltalinaed ti bagyo Francisco iti Philippine Sea ken agtultuloy a pumigsa agingga inton Martes, Hunyo 23, sakbay nga in-inut a kumapsot bayat nga agturong iti abagatan a paset ti Japan iti sumaganad nga aldaw.
Manamnama a rumwar iti Philippine Area of Responsibility inton rabii ti Biyernes, June 26, 2026.
