Bimmawi ti Team Spain kalpasan iti makapaupay a performance da iti umuna a group match no sadino napaay iti koponan a makaraamid iti aniaman a goal kontra ti Cape Verde.
Iti laban ti Spain ita nga aldaw kontra Saudi Arabia, tinambakan da ti naud-udi babaen ti iskor a 4-0.
Iti umuna a sangapulo a minuto ti ay-ayam, dagus a nangikabil ti 18-años a teenage sensation a ni Lamine Yamal iti napartak nga slide shot iti assist ni Mikel Oyarzabal.
Dayta ti umuna a World Cup goal iti karera ti agtutubo a pambato ti Barcelona.
Pinasarunuan pay daytoy ti Spain sakbay ti maika-25 a minuto. Nagsaruno a naiserrek ni Mikel Oyarzabal iti dua a goal iti las-ud laeng ti tallo a minuto.
Gapu iti nagsaruno a goal, natambakan ti Green Falcons iti 3-0 sakbay ti halftime.
Iti second half ti laban, ad-adda a natambakan iti Saudi Arabia kalpasan a maaddaan ti saan a ninamnama nga own goal iti defender-da a ni Hassan Altambakti iti maika-49 a minuto.
Daytoy a goal ket gapuanan ti napigsa a kugtar ti Spanish striker a ni Marc Cucurella a nag-bounce kenni Altambakti.
Nupay inkagumaan ti Saudi Arabia a lumaban ken mangaramid kadagiti kontra-atake, saan da a nakalusot iti natibker a depensa ti Espania.
Naadaan pay kuma ti maikalima a goal ti Espanya iti maudi a minuto babaen kenni Ferran Torres, ngem napaawan-bileg daytoy kalpasan ti napaut a panangrepaso ti VAR para iti offside.
Gapu iti panagballigi, mangun-una itan ti Spain ti Group H babaen ti uppat a puntos.###
