Napaayan iti baro a gundaway iti panagbiag dagiti 24 nga OFW returnees, pakairamanan dagiti naapektaran iti gubat ken riribuk idiay Middle East, babaen iti Community-Based Skills Training in Food Processing a pinasayaat ti Overseas Workers Welfare Administration wenno OWWA Regional Office I, iti panagtitinulong ti TESDA–Luciano Millan Memorial School of Arts and Trades (LMMSAT) ken Department of Trade and Industry wenno DTI.
Ti programa ket naggapu iti panggep a mangipaay kadagiti ad-adu pay a gundaway iti panagbiag ken panagnegosyo tapno matulungan dagiti nagawid nga OFW a makapangrugi manen iti bukodda.
Iti naisayangkat a hands-on training, naadal dagiti partisipante ti panagaramid iti nadumaduma a produkto a mabalin a paggatangan, kas iti chili oil, bangus sardines, kimchi, sukang pinakurat, pork embutido, salted egg ken pork tocino.
Nagted met ti DTI iti adal maipanggep iti panagnegosyo, kas iti umiso a panagparehistro iti negosyo, dagiti programa ti gobyerno a mabalin a pagnumaran, ken dagiti oportunidad a makatulong iti pannakaitakder ken panagdur-as ti bukod a pagbiagan.
Babaen kadagitoy a pagsasanay, namnamaen dagiti ahensya a mapabileg dagiti OFW returnees iti panangaramidda iti natalged ken napagtalkan a pagtaengan para kadagiti pamiliada ditoy pagilian. (Bombo Lorielyn Llavore)
