Nangiyusuat ti La Union Provincial Jail (LUPJ) ti livelihood program para kadagiti Persons Deprived of Liberty (PDLs) partikular iti panagaramid ti handmade rugs ken potholders manipud kadagiti daan a tela–a mailaklako itan iti publiko.
Panggep ti programa nga agbalin a produktibo dagiti PDL ken mapasaayat iti kabaelanda bayat nga adda iti kustodiya. Malaksid iti inaldaw a panagwatwat ken panagmula ti nateng, masursuruan da iti panagaramid dagiti produkto a mabalin a pamastrekan ken makatulong iti pamilya da.
Manual a dadaiten dagiti PDL dagiti produkto babaen ti dagom ken sinulid kas paset ti skills training ken rehabilitation. Segun ti LUPJ, makatulong iti programa iti panangpasayaat ti disiplina, panagtalek iti bukod a bagi, ken panagsagana iti panagsubli da iti komunidad.
Direkta a maiturong ti 60% a birok iti PDL a nagaramid tapno makatulong iti gastusen ti pamilya da karaman iti taraon, agas, ken edukasion. Ti nabatbati a 40% ket maitukon iti asosasion kas emergency fund para kadagiti PDL nga agkasapulan ti tulong.
Magatang dagiti handmade rugs ken potholders idiay La Union Pasalubong Center, Mabanag Building, City of San Fernando, La Union, manipud alas-otso ti bigat agingga alas-singko ti malaem. Umaw-awat met iti LUPJ ti orders ken dagiti kayat na iti makipartner iti programa.###
