Indauloan ti Lokal a Gobierno ti Agoo, La Union iti panangimula ti bougainvillea ken aroo trees idiay Agoo Eco Park ita nga aldaw, Hulio 2, 2026, kas paset ti agtultuloy a panangipatungpalda iti programa para iti panangsalaknib iti aglawlaw ken panangitag-ay iti napaut a panagdur-as.
Panggep ti aktibidad iti panangpapintas ken panangtaripato iti maysa kadagiti kangrunaan a natural a pagpasiaran iti ili.
Kas paset ti aktibidad, nagmula dagiti nakipaset ti bougainvillea iti aglawlaw ti baro a walkway a manglikmut iti lagoon ken aroo trees iti picnic areas tapno ad-adda a mapapintas ti Agoo Eco Park.
Daytoy ket mangipakita met iti pannakikadua dagiti naduma-duma a sektor iti panangsalaknib iti aglawlaw ken panangpasayaat iti pannakipaset ti komunidad kadagiti programa a mangaywan iti kinaparsuaan.
Segun iti LGU Agoo, iti daytoy nga inisiatiba ket mangiparangarang iti naurnos a pannakikadua ti lokal a gobierno ken ti komunidad iti panangsalaknib ken panangpapintas kadagiti natural a baknang ti ili para iti pagimbagan dagiti agdama ken sumaruno a kaputotan.
