Nangisayangkat ti funeral prayer dagiti tallo nga annak ti pimmusay a lider ti Iran a ni Ayatollah Ali Khamenei, bayat a rinibu nga umili ken nangato ti ranggona nga opisial ti timmabuno iti seremonia idiay Tehran.
Timmabuno ken nagkararag da Mostafa, Meysam ken Masoud Khamenei iti sango ti lungon ti amada.
Saan a dimmar-ay ni Mojtaba Khamenei, a maibilang a posible a sumaruno a Supreme Leader ti Iran.
Maipalagip a napapatay ni Ayatollah Ali Khamenei agraman ti sumagmamano a kameng ti pamiliana iti panagbomba nga inaramid ti Estados Unidos ken Israel idi Pebrero 28, a nangiturong iti sumagmamano a lawas a gubat sakbay ti temporary ceasefire.
Naiplastar met kabayatan ti seremonia dagiti lungon dagiti dadduma pay a pimmusay a kakabagian, pakairamanan ti anak na a babae, manugang ken 14-bulan nga apo-na.
Dimmar-ay met ni Iranian President Masoud Pezeshkian ken Parliament Speaker Mohammad Baqer Qalibaf.
Kas paset ti panagladingit, nangisayangkat ti Iran iti makalawas a funeral procession para iti sigud a lider ken ti pamiliana, karaman ti panangitulod iti bangkayna iti sumagmamano a sagrado a lugar dagiti Shi’ite idiay Iraq.
Agingga ita, saan pay a nagparang iti publiko ni Mojtaba Khamenei, a maipagarup a nasugatan iti panangraut ti Estados Unidos ken Israel sumagmamano a bulan ti napalabas. Adda dagiti report a nakaro ti kasasaadna, ngem awan pay ti opisial a kumpirmasion.###
