Nupay saan a manamnama nga ag-landfall ni Bagyo Inday, agtaltalinaed nga alerto ken nakasagana ti Provincial Government of La Union (PGLU) kadagiti posible nga epektona iti probinsia.
Kas paset ti panagsagana, nangisayangkat ti Provincial Disaster Risk Reduction and Management Office (PDRRMO), agraman ti Provincial Disaster Risk Reduction and Management Council, ti Pre-Disaster Risk Assessment (PDRA) idi Hulio 7, 2026 tapno mapatibker iti contingency plan ti probinsia.
Iti naisayangkat a PDRA, natalantan ti risk and vulnerability analysis kadagiti flood-prone, landslide-prone, ken coastal areas a mabalin a maapektaran iti storm surge. Naipadamag met ti prepositioning dagiti relief supplies, agraman dagiti food packs, hygiene kits, ken dadduma pay a probision ti emerhensia, tapno masigurado iti dagus a panagsungbat no kasapulan.
Nupay saan a manamnama a direkta nga ag-landfall ti bagyo, posible a mapasaran ti La Union ti localized thunderstorms mangrugi ita a lawas. Gapu iti daytoy, agtultuloy ti panangmonitor ti PDRRMO iti panaggaraw ti bagyo. Nakasagana met dagiti response team, kasta met dagiti sea ken land-based assets, para iti dagus a pannakaipakat no kasapulan.
Kabayatanna, impadamag ti La Union Police Provincial Office a nakaalerto dagiti personnel da, pakairamanan ti Search, Rescue and Retrieval Teams ken Incident Command System. Agtultuloy met ti koordinasion ken community engagement ti Coast Guard La Union iti panangipaay iti safety reminders ken pannakapainget ti inter-agency coordination.
Babaen ti direktiba ni Governor Mario Eduardo C. Ortega, binilin ti PGLU dagiti amin a component local government units nga agtalinaed a nakasagana ken alerto tapno masigurado ti kinatalged ken pagimbagan ti tunggal umili iti La Union.###
