Nagtitipon dagiti 167 a miembro ti kooperatiba manipud iti nagduduma a paset ti La Union iti Agoo Eco Park idiay Brgy. Sta. Rita West, Agoo, La Union idi Hulio 4, 2026 tapno rambakan ti International Day of Cooperatives nga addaan ti tema a “Cooperatives for a Peaceful World.”
Nakipamaysa iti Gobierno Probinsial ti La Union babaen ti Provincial Cooperative Development Office, iti pannakitinnulong ti La Union Provincial Cooperative Development Council, iti programa nga indauluan ti Cooperative Development Authority Region 1 Extension Office (CDA R1 EO).
Itampok ti selebrasion ti Coop Zumba, Coastal Clean-Up, ken Coop Trade Fair.
Panggep ti panagrambak a mapalawa iti pannakaammo ti publiko iti kinapateg ti cooperative business model ken ti napateg nga akem dagiti kooperatiba iti pannakapataud ti panggedan, panagdur-as ti ekonomia, ken panagdur-as ti komunidad. Itampok pay ti kontribusion dagiti kooperatiba iti panangtaming kadagiti sangalubongan a karit kas iti seguridad ti taraon, financial and social inclusion, ken climate resilience.
Naisayangkat ti selebrasion maitunos iti United Nations General Assembly Resolution A/RES/80/182, a mangbigbig iti napateg nga akem dagiti kooperatiba iti inclusive economic and social development. Paset daytoy ti agtultuloy a pananglaglagip iti International Day of Cooperatives wenno CoopsDay iti tunggal umuna a Sabado ti Hulio, maitunos iti General Assembly Resolution 47/90.
Dimmar-ay iti programa ni CDA R1 EO Regional Director Atty. Frederick Joe N. Robles ken ti Supervising Cooperative Development Specialist a ni Edilberto M. Unson, agraman ti Regional Director ti Department of Trade and Industry Region 1 a ni Merlie D. Membrere.
Nakipaset met dagiti City ken Municipal Cooperative Development Officers, pannakabagi ti Liga ng mga Cooperative Development Officers sa Pilipinas–La Union Chapter, ken opisyales ti Brgy. Sta. Rita Laud, Agoo, La Union.###
