Agtultuloy ti panangpaneknek ti Gobierno Siudad ti San Fernando nga iti maibilang nga awan serserbina a basura ket makayeg pay laeng ti benepisio kadagiti umili babaen ti programa a “Palit Basura, Palit Bombilya, Palit Gulong Project”.
Babaen ti programa, maallukoy dagiti umili nga agkolekta ken mangisina kadagiti recyclables ken dadduma pay a klase ti basura a kasukat dagiti punla ken grocery items a makatulong iti inaldaw a kasapulanda.
Kabayatan ti panagkolekta ti basura idiay Barangay Calabugao idi Hunio 19, 2026, nakakolekta ti Gobierno Siudad ti 2.5 a tonelada a basura a naiyawat iti City Environment and Natural Resources Office para iti umno a pannakaproseso. Nakaawat dagiti 30 a residente dagiti punla ken grocery goods a kasukat ti naurnongda a basura.
Karaman kadagiti naurnong ket dagiti pappapel, karton, plastik, asero, landok, bubog, e-waste, ken fluorescent tubes a naipasidong iti umno a pannakaproseso para iti natalged a pannakaibelleng ken pannaka-recycle.
Immuna a naipatungpal iti programa idi Hunio 11 agingga 13 idiay Barangay Baraoas ken Barangay Cabarsican, a 70 a sangakabbalayan ti nakapamaysa iti nasao nga inisiatiba.
Panggep ti programa nga itandudo iti umno a panangilasin ken pannakaibelleng dagiti basura bayat a makaited ti benepisio iti aglawlaw ken direkta a benepisio kadagiti umili.
Babaen iti daytoy a programa, maipakita a ti basura ket mabalin a paset ti solusion iti panangtaripato ti aglawlaw babaen ti disiplina, panagkaykaysa, ken aktibo a pannakipaset ti komunidad.
Agtultuloy ti panangpapigsa ti Gobierno Siudad ti San Fernando kadagiti programana iti aglawlaw ken parparegtaen dagiti Fernando ken Fernanda a makitinnulong iti pannakataginayon ti kinadalus ken pannakataripato ti aglawlaw.###
