LA UNION – Maaddaan ti Ligtas Pinoy Centers iti ili ti Bangar ken Bagulin kalpasan a karaman dagiti dua a lokal a gobierno kadagiti immuna a benepisiario iti nasao a programa ditoy probinsia.
Pinermaan da Bangar Mayor Joy Pinzon Merin ken Bagulin Mayor Virgilio Flor iti Memorandum of Agreement (MOA) para iti proyekto bayat ti 2nd Quarter Regional Disaster Risk Reduction and Management Council (RDRRMC) I Full Council Meeting a naangay idi Hunio 30, 2026.
Ti Ligtas Pinoy Center ket programa ti Office of Civil Defense (OCD), iti pannakitinnulong ti Department of Public Works and Highways (DPWH) ken Department of the Interior and Local Government (DILG), para iti pannakaibangon dagiti moderno ken natibker nga evacuation centers nga agserbi a natalged a pagkamangan dagiti umili kabayatan dagiti kalamidad ken dadduma pay nga emerhensia.
Maibangon dagiti pasilidad kadagiti lugar a natalged iti hazard-prone areas ken nadisenio a makaibtur iti epekto ti napigsa a bagyo, maitunos iti Ligtas Pinoy Centers Act.
Tunggal evacuation center ket naglaon ti sleeping quarters, health care stations, hygiene stations, ken espasio para kadagiti taraken nga ayup dagiti evacuees tapno masigurado iti nasaysayaat ken nataltalged a panagtalinaed dagiti nabakwit nga umili.
Manamnama met a maipatungpal ti nasao a programa kadagiti dadduma nga ili ti La Union kas paset ti agtultuloy a pannakapapigsa ti disaster preparedness ken disaster resilience ditoy probinsia.
Segun kadagiti maseknan nga ahensia, panggep ti proyekto a mapapigsa iti kinasagana dagiti lokal a gobierno ken masigurado ti nataltalged a panagresponde kadagiti komunidad iti panawen dagiti kalamidad ken dadduma pay a didigra.###
