San Fernando City, La Union – Impakita ti Department of Education (DepEd) Region I iti agtultuloy a panagregget a mangpapigsa iti kalidad ti edukasion, mangipasigurado iti kinatalged ken pagimbagan dagiti estudiante karaman dagiti mannursuro, iti naangay a Regional Press Conference idi Hulio 9, 2026 idiay National Educators Academy of the Philippines (NEAP) Region I, San Vicente, San Fernando City, La Union.
Panggep ti panagtaripnong nga ipakaammo iti publiko dagiti napateg a programa, gannuat, ken patakaran a maipatpatungpal, kasta met dagiti balligi ken napateg nga aktibidad ti DepEd Regional Office I ken dagiti 14 nga Schools Division Offices iti rehion.
Ti press conference ken indauluan ni Department of Education Undersecretary Atty. Mel John I. Versoza, Regional Director Estela P. Leon-Cariño, ken Assistant Regional Director Rhoda T. Razon. Kasta met dagiti Schools Division Superintendents (SDS), Assistant Schools Division Superintendents (ASDS), lider ti nadumaduma a functional divisions ti Regional Office, ken dagiti kameng ti Secretariat manipud iti intero a Region I.
Karaman kadagiti kangrunaan a napagsasaritaan ket ti agtultuloy a pannakapapigsa ti Numeracy and Literacy Programs kas sungbat iti panggep ti departamento nga ad-adda a mapadur-as ti pundasional a paglaingan dagiti estudiante iti panagbasa, panagsurat, ken matematika.
Naited pay ti atension iti School Safety and Security, karaman dagiti addang a maipatpatungpal kalpasan dagiti napalabas nga insidente ti kinaranggas kadagiti sumagmamano a lugar ditoy pagilian.
Nailawlawag iti kinapateg ti umno a pannakaipatungpal dagiti emergency protocols, pakairamanan dagiti earthquake drills, fire drills, bomb threat response, ken active shooter drills a naisayangkat babaen ti koordinasion ti Philippine National Police (PNP) ken dadduma pay a partner agencies. Naipaganetget nga amin a panagsanay ket rumbeng a maaramid babaen ti panangusar iti trauma-informed approach tapno saan a mangpataud iti buteng wenno trauma kadagiti estudiante.
Maysa pay a naitampok a topiko ket ti Disaster Risk Reduction and Management, agraman ti umno a pannakaipatungpal dagiti pagannurotan iti pannakasuspende ti klase iti sidong ti kampania nga “Hayo, Hinay, Hinga”, nga agserbi a giya para iti napardas ken responsable a panagdesision bayat dagiti kalamidad ken dadduma pay nga emerhensia.
Impaganetget pay ti DepEd Region I iti kinapateg ti Mental Health ken Psychosocial Support Programs para kadagiti estudyante ken mannursuro. Segun kadagiti opisyal, agtultuloy a mapapigsa dagiti programa a mangipapaay iti emotional ken mental health support tapno masigurado iti natalged ken positibo nga aglawlaw kadagiti pagadalan.
Napagsasaritaan pay dagiti addang maipapan iti responsable a pannakausar dagiti cellphone ken social media iti uneg dagiti pagadalan, nga addan panggep a mataginayon ti disiplina, masalakniban ti pagimbagan dagiti estudiante, ken maitandudo ti natalged ken produktibo a pannakausar ti teknolohia.
Naikkan met importansya ti pannakaipatungpal dagiti preventive measures kontra dengue, nangruna kadagiti lugar a nakairekord ti panagadu ti kaso, pakairamanan ti Bagulin, babaen ti naing-inget a koordinasion kadagiti lokal a gobierno ken maseknan nga ahensia.
Kas paset ti agtultuloy a modernisasion ti edukasion, naiyam-ammo pay ti AGAP AI, maysa nga inisiatiba ti DepEd nga addaan panggep nga itandudo ti responsable, etika, ken addaan kaipapanan a pannakausar ti Artificial Intelligence (AI) iti panangisuro, panagadal, ken administratibo nga aktibidad. Naipaganetget nga agserbi ti AI a kas kasosio para kadagiti mannursuro iti panangpasayaat iti kalidad ti edukasion bayat a mataginayon ti kinapateg ti propesional a panangtingiting ken panangiwanwan dagiti mannursuro.
Iti ngudo ti programa, pinasingkedan ti DepEd Region I ti panagkumit na nga agtultuloy a mangipatungpal kadagiti makabaro, inclusive, ken natalged a programa ken polisiya a mangpasayaat iti kalidad ti edukasion iti intero a rehion.
Naipaganetget pay nga agtultuloy a mamonitor ken mapalawa dagiti gannuat ken programa a naipatungpal kadagiti nadumaduma nga Schools Division Offices tapno ad-adda a magunggonaan dagiti estudiante, mangisursuro, ken dadduma pay a maseknan.
Babaen ti panagtitinnulong a panagregget ti DepEd, lokal a gobierno, ken partner agencies, agtultuloy a maitantandudo ti natalged, ken de kalidad a sistema ti edukasion para iti tunggal estudiante iti Region I. (Bombo Ericka Quinzon)
