Nangisayangkat dagiti district hospitals ti La Union iti benchmarking activity tapno maadal ti cash receipt ken collection system nga us-usaren ti Naguilian District Hospital (NDH), kas paset ti pannakapapigsa ti financial management kadagiti pampubliko nga ospital ditoy probinsia.
Naisayangkat ti nasao nga aktibidad manipud Hunio 17 agingga 25, 2026, a tinabunuan dagiti Information Technology (IT) personnel, cashiers, collecting officers, ken sumagmamano a Chiefs of Hospitals dagiti district hospitals.
Segun ti Provincial Government of La Union, naisayangkat iti benchmarking kasaruno ti rekomendasion ti Commission on Audit (COA) kalpasan a nadlawda iti sistema nga inusar ti NDH iti naisayangkat nga audit.
Maibasar iti COA, makatulong ti sistema a mangpapartak iti pannakaproseso dagiti nayimprenta nga opisial a resibo, pannakapataud dagiti remittance report dagiti casiers, ken inaldaw a panangtimbeng kadagiti koleksion.
Naaramid ti sistema babaen ti inisiatiba ti Cashier and Collection Unit ken dagiti staff ti NDH. Ti panangusar daytoy ket maksayan iti manual encoding ken computation, mapasayaat iti kinaumiso dagiti pinansial a rekord, ken mangpasayaat iti transparency ken accountability iti panangkolekta kadagiti bayad iti ospital.
Segun iti gobierno probinsial, daytoy a gannuat ket paset ti panangitandudo iti innovation ken digital transformation iti serbisio pangsalun-at. Inyebkasda pay ti agtultuloy a suportana iti pannakaipatungpal dagiti innovative systems a nairanta a mangpadaras ken mangpasayaat iti pannakaipaay ti serbisio kadagiti umili ti La Union.###
