Pinasingkedan ti defense analyst a ni Dr. Renato de Castro nga awan ti aniaman a basaran iti waragawag dagiti sumagmamano a Chinese scholars a paset ti Taiwan iti Batan Island isu a China iti makinsoberania.
Kenunana, inimbento laeng ti China iti nasao a claim ken maysa daytoy a kadawyan a taktika ti Beijing no adda ti lugar a kayat da a tagikuaen.
Segun kenni de Castro, iti pagbasbasaran dagiti Chinese scholars ket iti maaw-awagan a “geographical link” wenno pannagsilpo ti Taiwan ken Batanes.
Innayonna nga adda ti Philippine Studies program nga indauluan ti Chinese scholar a ni Fan Dai ken pinunduan ti Beijing, a maipagarup a maus-usar tapno mangisaknap iti kastoy a propaganda.
Immunan a kinontra ti Pilipinas iti nasao a waragawag.
Segun ti Department of Foreign Affairs (DFA), saan a rumbeng a patulan wenno ikkan atension dagiti sasao nga inawagan na a “flights of fancy”.
Kabayatanna, kenuna ni Department of National Defense (DND) Secretary Gilberto Teodoro Jr. nga awan ti nakabasaranna ken nakakatkatawa iti nasao a claim.
Rimmuar iti isyu kabayatan ti kumarkaro a tension idiay West Philippine Sea, no sadino agtultuloy iti pananglapped ken pananggipit dagiti Chinese vessel kadagiti barko ti Pilipinas.
Impasigurado ti gobierno nga agtalinaed a natibker iti takder ti pagilian iti panangidepensa iti Batanes ken dadduma pay a teritorio ti Pilipinas kontra iti aniaman a palso a waragawag wenno pangta ti China.###
