Inrekomendan ti National Bureau of Investigation (NBI) iti Department of Justice (DOJ) iti panangipila dagiti kaso a kriminal kontra iti sigud nga Ateneo de Manila University men’s basketball team head coach a ni Tab Baldwin ken 11 a sabali pay mainaig iti pannakatay ti dua nga student-athletes nga isuda Rene Clert Baterbonia ken Divine Adili iti maysa a team-building activity idiay Dipaculao, Aurora.
Segun ti NBI, sangsanguen da Baldwin ken pito a sabali pay – a buklen ti innem nga assistant coaches ken maysa a physical therapist – iti reklamo a reckless imprudence resulting in two counts of homicide.
Kabayatanna, inrekomenda met ti ahensia iti panangipila ti kaso a simple negligence resulting in two counts of homicide kontra kenni Ateneo Athletics Director Emmanuel Fernandez ken tallo nga opisial ti resort idiay Dipaculao a nakaisayangkatan ti team-building activity.
Iti naisayangkat nga imbestigasion, nangala ti salaysay iti NBI manipud kadagiti nadumaduma nga opisial ti Ateneo, karaman ni Ateneo President Roberto “Bobby” Yap, SJ, ni Baldwin, dagiti miembro ti coaching staff, agdama ken sigud a players, physical therapist, utility personnel, ken dagiti mangmanmanehar iti resort.
Mainaig ditoy, inrefer met ti NBI iti Department of the Interior and Local Government (DILG) iti posible a panangipila ti administrative complaints kontra kadagiti sumagmamano nga opisial ti lokal a gobierno ti Dipaculao, Aurora, karaman dagiti opisial ti Business Permit and Licensing Office, Municipal Tourism and Cultural Development Office, ken Municipal Disaster Risk Reduction and Management Office.###
