Inpasigurado ti Malacañang a saan a maisakripision iti aglawlaw, suplay ti danom ken pagbiagan dagiti residente iti mailunglungalong a Pax Silica Project idiay New Clark City, Tarlac, kasaruno ti panagbuteng dagiti sumagmamano a grupo iti posible nga epekto daytoy iti aglawlaw ken komunidad.
Segun kenni Palace Press Officer Claire Castro, siguraduen ti gobierno a ti proyekto ket sumurot iti amin a maipatpatungpal a linteg, saan a makadadael iti aglawlaw, ken awan ti residente a mapapanaw nga awan ti maitutop a kompensasion.
Maibasar iti panagsukimat ti National Water Resources Board (NWRB), umdas iti suplay ti danom para iti proyekto a saan a maapektaran iti kabangibang a komunidad, bayat nga inpaganetget ti Department of Environment and Natural Resources (DENR) a saan daytoy nga agdur-as aginggana awan dagiti amin a kasapulan nga environmental clearances.
Innayon ti Palasyo a masalakniban met iti pagbiagan dagiti mannalon a mabalin a maapektaran ti proyekto.###
