Tallo nga indibidual iti naipadamag a pimmusay bayat a maysa pay iti mapukpukaw gapu iti epekto ti Bagyo Kiyapo (international name: Noul) ken na napapigsa a Southwest Monsoon wenno Habagat, segun ti National Disaster Risk Reduction and Management Council (NDRRMC).
Maibasar iti kauddian a situational report, dagiti nailista a pimmusay ket manipud idiay Davao Region ken SOCCSKSARGEN nga agdama pay laeng a maberberipika, bayat a dumanonen iti 41,382 a pamilya wenno 193,576 nga indibidual manipud kadagiti pito a rehion iti naapektaran ti dakes a panawen.
Iti pakabuklan a bilang, 2,359 a pamilya wenno 9,380 a tattao iti temporario nga agtaltalinaed kadagiti evacuation centers, bayat a 235 a pagtaengan iti nadadael idiay Western Visayas, Zamboanga Peninsula, SOCCSKSARGEN, ken Bangsamoro Autonomous Region in Muslim Mindanao (BARMM).
Kabayatanna, rimmuaren ti Bagyo Kiyapo iti Philippine Area of Responsibility (PAR) ngem agtultuloy a mangpatpatudo iti Habagat kadagiti sumagmamano a paset ti pagilian, isu a nagpanawagan dagiti otoridad iti publiko nga agtalinaed nga alerto ken sumurot kadagiti abiso ti lokal a gobierno.###
