Nangipila ni Senate Committee on Energy Chairperson Sen. Erwin Tulfo ti maysa a resolusion nga addaan panggep nga imbestigaran iti agtultuloy a panagngato ti singir iti koriente ken maammuan dagiti rason iti likudan ti mapapati a nangato nga electric bills iti pagilian.
Segun kenni Tulfo, panggep ti imbestigasion a makaaramid kadagiti polisia a mangipaay ti napaut a proteksion kadagiti consumers, karaman ti panangtalantan kadagiti reklamo mainaig iti komplikado a billing statements, biddut a panangbasa iti metro, ken masansan a power interruptions.
Impaganetget ti senador a nupay adda ti karbengan dagiti electric distribution utilities ken generation companies a mabawi dagiti nainkalintegan a gastosda, nasken met a masigurado ti patas, transparent, umiso, ken nainkalintegan a singir ken dagus a pannakarisut dagiti reklamo dagiti consumers.
Innayon na pay adda pay laeng ti Pilipinas iti kangatuan a presio ti koriente iti Southeast Asia, isu nga inkari daytoy nga idauluanna ti Senate Committee on Energy iti panangbirok dagiti addang a mangpababa ken aramiden a makabael iti balor ti kuryente para kadagiti Pilipino.###
