Nagtipon dagiti progresibo a grupo iti Elliptical Road idiay Quezon City sakbay ti maikalima a SONA ni Presidente Ferdinand Marcos Jr. ken maysa kadagiti panawagan da ket iti nainget a panangkontra iti proyekto a “Pax Silica.”
Impaganetget dagiti raliyista iti panagamak iti posible nga epekto ti inisiatiba iti aglawlaw, natural resources, ken seguridad ti pagilian.
Ti Pax Silica ket maysa nga industrial plan nga adda pakainaiganna iti panangpalawa ti semiconductor ken artificial intelligence supply chain iti pannakitinnulong ti Estados Unidos ken dadduma pay a partners.
Segun ti gobierno, manamnama a mangpartuat daytoy ti trabaho ken mangpapigsa ti panagpuonan.
Nupay kasta, pagam-amkan dagiti sumagmamano a grupo a mabalin daytoy a mangigubuay ti dakkel nga epekto iti panagusar ti danom, enerhiya, ken mangpakaro dagiti isyu ti aglawlaw ken saritaan ti geopolitikal.###
