Inladawan ti sigud a Land Bank of the Philippines (LBP) Shaw Boulevard Branch Manager Violeta Constantino nga “unusual” wenno saan a kadawyan iti encashment ti sag-₱125 million confidential funds ti Office of the Vice President (OVP), ngem impaganetget na a lehitimo dagiti transaksion.
Timmestigo ni Constantino iti maika-10 nga aldaw ti impeachment trial ni Bise Presidente Sara Duterte mainaig ti Article I ti impeachment complaint a mangtaltalantan iti maipagarup a panagusar ti ₱612.5 million confidential funds ti OVP ken Department of Education (DepEd).
Segun iti testigo, uppat a daras a nag-withdraw ni OVP Special Disbursing Officer Gina Acosta ti sag-₱125 million manipud Disyembre 2022 agingga Setyembre 2023.
Sakbay iti tunggal encashment, kenunana a timmawag pay nga umuna ti OVP Cash Department tapno ipakaammo iti plano a withdrawal.
Iti panagdamag ni Senator-Judge Erwin Tulfo, imbaga ni Constantino a nupay saan a normal iti nasao a kadakkel a cash withdrawal, saan da daytoy a kinuestion gapu ta adda ti inisial nga abiso iti OVP ken kumpleto dagiti kasapulan a dokumento.
Innayon na pay iti panagdamag ni Senator-Judge Bam Aquino nga amin a cash transactions a limmabes ti ₱500,000 ket naireport iti Anti-Money Laundering Council (AMLC).
Segun pay kenni Constantino, daytoy ti kaunaan a gundaway a nakakita isuna ti kasyay kadakkel a cash encashment gapu ta kadawyan a maisaysayangkat dagiti dadakkel a transaksion babaen ti tseke wenno electronic transfer. Maikabkabil met iti tallo wenno uppat nga atiddog a gym bag iti kuarta a na-encash.
Iti direct examination nga indauluan ni House Prosecutor ken Manila Representative Joel Chua, naipakita iti dagiti uppat a cash withdrawals a dimmanon iti pakabuklan a ₱500 million.
Saanen a naipasidong iti cross-examination ti kampo ni Bise Presidente Sara Duterte iti testigo.###
