BR LA UNION – Inladawan ni Violeta Constantino, retirado a branch manager ti Land Bank of the Philippines (LandBank) Shaw Boulevard, kas “unusual” wenno karkarna iti uppat a cash withdrawals a P125 million ti tunggal maysa nga inaramid ti Office of the Vice President (OVP), wenno agdagup iti P500 million.
Bayat ti panagtultuloy ti impeachment trial ni Bise Presidente Sara Duterte idi Miyerkoles, Hulyo 29, kinuna ni Constantino nga iti 32 a tawen a panagserbina iti LandBank, daytoy ti kadakkelan a cash withdrawal a natamingna.
Kaadwan ngamin kunana nga ahensiya ti gobierno ket agus-usar ti online transaction wenno tseke para kadagiti bayadanda, isu a manmano ti dakkel a cash withdrawals.
Inlawlawagna a nupay karkarna ti nasao a transaksyon, dimmalan met daytoy iti umno a proseso, kalpasan a nangipaay ti advance notice ti OVP iti bangko tapno maisagana ti kasapulan a gatad ti kuwarta.
Kinuna pay ti sigud a bank manager a ti P125 million a kuwarta para iti tunggal transaction ket naikabil iti uppat a gym bags ken nairuar manipud iti bangko babaen ti trolley.
Awan ti nausar nga armored vehicle, agsipudta maipagarop nga awan ti katulagan ti bangko ken ti OVP para iti cash delivery, ken saan a kiniddaw ti opisina iti nasao a serbisyo.
Inlawlawag ni Constantino a saan a dinamag ti LandBank no pangusaran dagiti nai-withdraw a kuwarta, ken saanda met nga ammo idi nga adda pakainaigan iti confidential wenno intelligence funds.
Kabayatanna, impaganetget ni Senator-judge Alan Peter Cayetano a ti panagbalin nga “unusual” ti maysa a transaksyon ket saan a kayat a sawen nga ilegal daytoy.
Immanamong met ni Constantino ken imbaga nga awan ti panaglabsing iti proseso ti check-encashment gaputa kompleto dagiti dokumento ken otorisado ti tao a nangala ti kuwarta.
Kinumpirma met ti kampo ni VP Sara iti authentication dagiti naipakita a tseke a pinondoan ti Philippine Treasury, ken legal nga in-encash ti sigud nga OVP Special Disbursing Officer a ni Gina Acosta.
