Inawagan ni Bise Presidente Sara Duterte a “tuta” da Presidente Ferdinand Marcos Jr. ken sigud a Senador Antonio Trillanes IV iti International Criminal Court (ICC).
Inbaga na daytoy kabayatan iti naisayangkat a “Free Duterte Now” rally iti ruar ti ICC idiay The Hague, Netherlands idi Miyerkules, Hulyo 29, bayat nga agtultuloy iti panagdingngeg iti kaso a crimes against humanity kontra kenni sigud a Presidente Rodrigo Duterte.
Iti panagbetla na, kinuestion ni Duterte iti panagbalin a patas ti ICC ken inpaganetget a maipagarup a maus-usar iti korte kontra iti pamilya da.
Binabalaw na met iti mapapati a nagbalin nga akem da Presidente Marcos ken Trillanes iti panangkaso ken panangarestar iti sigud a Presidente.
Agtultuloy met nga ipagpaganetget ti kampo ni sigud a Presidente Rodrigo Duterte nga awan iti hurisdiksion ti ICC ditoy Pilipinas kalpasan iti panagikkat ti pagilian iti Rome Statute idi 2019.
Nupay kasta, taktakderan ti ICC a mabalin daytoy nga usigen dagiti kaso nga adda pakainaigan na kadagiti alegado a krimen a napasamak idi miembro pay laeng iti pagilian ti Rome Statute.###
